KHwahishon ka bayan hain aansu
ḳhvāhishoñ kā bayān haiñ aañsū
goyā dil kī zabān haiñ aañsū
sabr kī rāz-dān haiñ āñkheñ
zabt kā imtihān haiñ aañsū
chashm-e-hijrāñ ko kosne vaalo
vasl kī dāstān haiñ aañsū
maut kī haiñ 'alāmateñ patthar
zindagī kā nishān haiñ aañsū
in ke dam se hai raunaq-e-girya
yā'nī āñkhoñ kī shaan haiñ aañsū
ḳhāmushī meñ kalām karte haiñ
dard ke tarjumān haiñ aañsū
KHwahishon ka bayan hain aansu
goya dil ki zaban hain aansu
sabr ki raaz-dan hain aankhen
zabt ka imtihan hain aansu
chashm-e-hijran ko kosne walo
wasl ki dastan hain aansu
maut ki hain 'alamaten patthar
zindagi ka nishan hain aansu
in ke dam se hai raunaq-e-girya
ya'ni aankhon ki shan hain aansu
KHamushi mein kalam karte hain
dard ke tarjuman hain aansu
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
