har baat pe palkon ko bhigoya nahin karte

har baat pe palkoñ ko bhigoyā nahīñ karte

ronā bhī agar aa.e to royā nahīñ karte

din bhar hameñ ārām kā ik pal nahīñ miltā

ghar jā ke bhī ārām se soyā nahīñ karte

manzil kā nishāñ hotā hai chhāloñ kā lahū bhī

ham paañv ke zaḳhmoñ ko yuuñ dhoyā nahīñ karte

chāhat se milā ho ki muqaddar se milā ho

pā lete haiñ jis ko use khoyā nahīñ karte

jin peḌoñ kī shāḳhoñ pe hoñ nafrat ke faqat phal

biij un ke zamīñ meñ kabhī boyā nahīñ karte

kuchh bātoñ ko kahne kī zarūrat nahīñ hotī

har jazbe ko lafzoñ meñ piroyā nahīñ karte

har baat pe palkon ko bhigoya nahin karte

rona bhi agar aae to roya nahin karte

din bhar hamein aaram ka ek pal nahin milta

ghar ja ke bhi aaram se soya nahin karte

manzil ka nishan hota hai chhaalon ka lahu bhi

hum panw ke zaKHmon ko yun dhoya nahin karte

chahat se mila ho ki muqaddar se mila ho

pa lete hain jis ko use khoya nahin karte

jin peDon ki shaKHon pe hon nafrat ke faqat phal

bij un ke zamin mein kabhi boya nahin karte

kuchh baaton ko kahne ki zarurat nahin hoti

har jazbe ko lafzon mein piroya nahin karte