gul na hon Khaar-e-mughilan hi sahi

gul na hoñ ḳhār-e-muġhīlāñ hī sahī

kuchh to ho chashmak-e-pinhāñ hī sahī

un ke dāman kī tamannā kab tak

aao ab apnā garebāñ hī sahī

kuchh to ho dil kī rafāqat ke liye

iztirāb-e-shab-e-hijrāñ hī sahī

mere īmāñ se kisī ko matlab

ḳhair vo dushman-e-īmāñ hī sahī

dil kī fitrat hai sharar-andozī

zindagī sho'la-ba-dāmāñ hī sahī

phir bhī kuchh sa’y-e-amal achchhī hai

aap par rahmat-e-yazdāñ hī sahī

tāb-e-shikva jo nahīñ hai un se

shikva-e-gardish-e-daurāñ hī sahī

chāhiye is ke liye bhī taufīq

but-garī fitrat-e-insāñ hī sahī

gul na hon KHar-e-mughilan hi sahi

kuchh to ho chashmak-e-pinhan hi sahi

un ke daman ki tamanna kab tak

aao ab apna gareban hi sahi

kuchh to ho dil ki rafaqat ke liye

iztirab-e-shab-e-hijran hi sahi

mere iman se kisi ko matlab

KHair wo dushman-e-iman hi sahi

dil ki fitrat hai sharar-andozi

zindagi sho'la-ba-daman hi sahi

phir bhi kuchh sa’y-e-amal achchhi hai

aap par rahmat-e-yazdan hi sahi

tab-e-shikwa jo nahin hai un se

shikwa-e-gardish-e-dauran hi sahi

chahiye is ke liye bhi taufiq

but-gari fitrat-e-insan hi sahi