kiya hai ishq to ruswaiyon ka Dar kaisa

kiyā hai 'ishq to rusvā.iyoñ kā Dar kaisā

ki jis meñ soz na ho vo bhalā jigar kaisā

vo 'ishq 'ishq nahīñ jis meñ ho ġharaz koī

diloñ kā saudā huā ho to māl-o-zar kaisā

nishān-e-manzil-e-maqsūd tak dikhā na sake

to phir batā.e koī hai vo rāhbar kaisā

mirā bhī ḳhuun hai shāmil yahāñ kī miTTī meñ

ḳhilāf mere uThāte ho tum ye shar kaisā

dubāra koī bhī hijrat to ab nahīñ hogī

yahīñ pe rahnā hameñ hai to phir safar kaisā

ye ham ne maanā ki us meñ bahut se jauhar haiñ

kisī ke kaam na aa.e to vo hunar kaisā

jahāñ se aa.e the jaanā to hai vahīñ ik din

to aa.e maut kabhī us se ham ko Dar kaisā

Dare nahīñ haiñ kabhī āñdhiyoñ ke ḳhauf se ham

na hausla ho to phir dasht kā safar kaisā

use gumāñ hai ki 'irshād' nā-tavāñ haiñ ham

ḳhabar nahīñ use rakhte haiñ ham jigar kaisā

kiya hai 'ishq to ruswaiyon ka Dar kaisa

ki jis mein soz na ho wo bhala jigar kaisa

wo 'ishq 'ishq nahin jis mein ho gharaz koi

dilon ka sauda hua ho to mal-o-zar kaisa

nishan-e-manzil-e-maqsud tak dikha na sake

to phir batae koi hai wo rahbar kaisa

mera bhi KHun hai shamil yahan ki miTTi mein

KHilaf mere uThate ho tum ye shar kaisa

dubara koi bhi hijrat to ab nahin hogi

yahin pe rahna hamein hai to phir safar kaisa

ye hum ne mana ki us mein bahut se jauhar hain

kisi ke kaam na aae to wo hunar kaisa

jahan se aae the jaana to hai wahin ek din

to aae maut kabhi us se hum ko Dar kaisa

Dare nahin hain kabhi aandhiyon ke KHauf se hum

na hausla ho to phir dasht ka safar kaisa

use guman hai ki 'irshad' na-tawan hain hum

KHabar nahin use rakhte hain hum jigar kaisa