dekh yun meri taraf jaise shanasai na ho

dekh yuuñ merī taraf jaise shanāsā.ī na ho

maiñ to rusvā huuñ kahīñ terī bhī rusvā.ī na ho

ġham nahīñ to 'aks ban kar tujh se vābasta rahūñ

dil tirā patthar sahī lekin nazar ā.īna ho

pā.egā dānishvaroñ meñ tū bahut ūñchā maqām

jo bhī chāhe jurm kar ik jurm-e-dānā.ī na ho

fitrat-e-āzād ke pairoñ meñ zanjīreñ na Daal

pyaar kar phūloñ se ḳhushbū kā tamannā.ī na ho

duur tak kāñToñ bhare raste farozāñ ho ga.e

zindagī kyūñkar rahīn-e-ābla-pā.ī na ho

guuñj uThtī haiñ fazā.eñ kyuuñ mirī āvāz par

koī hangāma pas-e-dīvār-e-tanhā.ī na ho

fitratan har hādse par muskurā detā huuñ maiñ

sochtā huuñ aur merī qadr-afzā.ī na ho

Duub kar maiñ aap hī rah jā.ūñ apnī zaat meñ

is qadar bhī ai 'muzaffar' mujh meñ gahrā.ī na ho

dekh yun meri taraf jaise shanasai na ho

main to ruswa hun kahin teri bhi ruswai na ho

gham nahin to 'aks ban kar tujh se wabasta rahun

dil tera patthar sahi lekin nazar aaina ho

paega danishwaron mein tu bahut uncha maqam

jo bhi chahe jurm kar ek jurm-e-danai na ho

fitrat-e-azad ke pairon mein zanjiren na Dal

pyar kar phulon se KHushbu ka tamannai na ho

dur tak kanTon bhare raste farozan ho gae

zindagi kyunkar rahin-e-abla-pai na ho

gunj uThti hain fazaen kyun meri aawaz par

koi hangama pas-e-diwar-e-tanhai na ho

fitratan har hadse par muskura deta hun main

sochta hun aur meri qadr-afzai na ho

Dub kar main aap hi rah jaun apni zat mein

is qadar bhi ai 'muzaffar' mujh mein gahrai na ho