apna dukhDa suna ke dekh liya

apnā dukhḌā sunā ke dekh liyā

jag ko ḳhud par hañsā ke dekh liyā

bin hamāre ujaaḌ thī mahfil

us ne sab ko bulā ke dekh liyā

'ishq kā dard kam nahīñ hotā

har davā aazmā ke dekh liyā

zinda dargor kis ko kahte haiñ

ghar pe taḳhtī lagā ke dekh liyā

dil ke dāġhoñ se bazm raushan thī

us ne sham'eñ bujhā ke dekh liyā

jis ko dā'vā thā rāz-dārī kā

raaz apnā sunā ke dekh liyā

dushmanī un ke dil meñ kitnī thī

dost un ko banā ke dekh liyā

bijliyāñ kitnī past hotī haiñ

ik nasheman banā ke dekh liyā

kis ko kahte haiñ jashn-e-rusvā.ī

terī mahfil meñ aa ke dekh liyā

ham se kitnī unheñ mohabbat thī

un ke dil meñ samā ke dekh liyā

dard-e-sar to 'taqī' bahāna thā

tum ne sar ko dabā ke dekh liyā

apna dukhDa suna ke dekh liya

jag ko KHud par hansa ke dekh liya

bin hamare ujaD thi mahfil

us ne sab ko bula ke dekh liya

'ishq ka dard kam nahin hota

har dawa aazma ke dekh liya

zinda dargor kis ko kahte hain

ghar pe taKHti laga ke dekh liya

dil ke daghon se bazm raushan thi

us ne sham'en bujha ke dekh liya

jis ko da'wa tha raaz-dari ka

raaz apna suna ke dekh liya

dushmani un ke dil mein kitni thi

dost un ko bana ke dekh liya

bijliyan kitni past hoti hain

ek nasheman bana ke dekh liya

kis ko kahte hain jashn-e-ruswai

teri mahfil mein aa ke dekh liya

hum se kitni unhen mohabbat thi

un ke dil mein sama ke dekh liya

dard-e-sar to 'taqi' bahana tha

tum ne sar ko daba ke dekh liya