ye ramz-o-sher bahr-o-ghazal sab hamin ke hain

ye ramz-o-she'r bahr-o-ġhazal sab hamīñ ke haiñ

lekin ye saare phuul kisī dil-nashīñ ke haiñ

is dasht-e-be-amāñ ne Darāyā nahīñ mujhe

jitne bhī saañp haiñ vo mirī āstīñ ke haiñ

ab bārgāh-e-‘ishq meñ aisā maqām hai

āñkhoñ se hī adā haiñ jo sajde jabīñ ke haiñ

ik terī haañ meñ haañ ko milāyā tamām 'umr

ai yaar ham ḳhilāf jo lafz-e-nahīñ ke haiñ

apnā pata kisī ko mile bhī to kyā 'bashar'

ye 'ishq jis jahāñ kā hai ham bhī vahīñ ke haiñ

ye ramz-o-she'r bahr-o-ghazal sab hamin ke hain

lekin ye sare phul kisi dil-nashin ke hain

is dasht-e-be-aman ne Daraya nahin mujhe

jitne bhi sanp hain wo meri aastin ke hain

ab bargah-e-‘ishq mein aisa maqam hai

aankhon se hi ada hain jo sajde jabin ke hain

ek teri han mein han ko milaya tamam 'umr

ai yar hum KHilaf jo lafz-e-nahin ke hain

apna pata kisi ko mile bhi to kya 'bashar'

ye 'ishq jis jahan ka hai hum bhi wahin ke hain