kab chhoDna thi pyar ki manzil use kahna

kab chhoḌnā thī pyaar kī manzil use kahnā

ik baat ne badlā hai mirā dil use kahnā

laḌ laḌ ke hue jaate haiñ andar se shikasta

ham ḳhud hī khaḌe apne muqābil use kahnā

kyā soch ke nikle the samundar kī taraf ham

ab soch rahe haiñ sar-e-sāhil use kahnā

āsān nahīñ rāh-e-ta'alluq se palaTnā

kuchh kaam huā karte haiñ mushkil use kahnā

jhūTā na farebī hai tirā chāhne vaalā

bas ye ki nahīñ thā tire qābil use kahnā

ḳhā.if hai bhalā kis liye raftār se merī

maiñ huuñ hī nahīñ dauḌ meñ shāmil use kahnā

kab chhoDna thi pyar ki manzil use kahna

ek baat ne badla hai mera dil use kahna

laD laD ke hue jate hain andar se shikasta

hum KHud hi khaDe apne muqabil use kahna

kya soch ke nikle the samundar ki taraf hum

ab soch rahe hain sar-e-sahil use kahna

aasan nahin rah-e-ta'alluq se palaTna

kuchh kaam hua karte hain mushkil use kahna

jhuTa na farebi hai tera chahne wala

bas ye ki nahin tha tere qabil use kahna

KHaif hai bhala kis liye raftar se meri

main hun hi nahin dauD mein shamil use kahna