raqs karne ka mila hukm jo dariyaon mein

raqs karne kā milā hukm jo dariyāoñ meñ

ham ne ḳhush ho ke bhañvar bāñdh liye paañv meñ

un ko bhī hai kisī bhīge hue manzar kī talāsh

buuñd tak bhī na bo sake jo kabhī sahrāoñ meñ

a mire ham-safaro tum bhī thake-hāre ho

dhuup kī tum to milāvaT na karo chhāñv meñ

jo bhī aatā hai batātā hai nayā koī ilaaj

baT na jaa.e tirā bīmār masīhāoñ meñ

hausla kis meñ hai yūsuf kī ḳharīdārī kā

ab to mahñgā.ī ke charche haiñ zuleḳhāoñ meñ

jis barahman ne kahā hai ki ye saal achchhā hai

us ko dafnāo mire haath kī rekhāoñ meñ

vo ḳhudā hai kisī TuuTe hue dil meñ hogā

masjidoñ meñ use DhūñDo na kalīsāoñ meñ

ham ko aapas meñ mohabbat nahīñ karne dete

ik yahī aib hai is shahr ke dānāoñ meñ

mujh se karte haiñ 'qatīl' is liye kuchh log hasad

kyuuñ mire sher haiñ maqbūl hasīnāoñ meñ

raqs karne ka mila hukm jo dariyaon mein

hum ne KHush ho ke bhanwar bandh liye panw mein

un ko bhi hai kisi bhige hue manzar ki talash

bund tak bhi na bo sake jo kabhi sahraon mein

a mere ham-safaro tum bhi thake-haare ho

dhup ki tum to milawaT na karo chhanw mein

jo bhi aata hai batata hai naya koi ilaj

baT na jae tera bimar masihaon mein

hausla kis mein hai yusuf ki KHaridari ka

ab to mahngai ke charche hain zuleKHaon mein

jis barahman ne kaha hai ki ye sal achchha hai

us ko dafnao mere hath ki rekhaon mein

wo KHuda hai kisi TuTe hue dil mein hoga

masjidon mein use DhunDo na kalisaon mein

hum ko aapas mein mohabbat nahin karne dete

ek yahi aib hai is shahr ke danaon mein

mujh se karte hain 'qatil' is liye kuchh log hasad

kyun mere sher hain maqbul hasinaon mein