qalb-o-nazar pe karb ki barsat hai abhi

qalb-o-nazar pe karb kī barsāt hai abhī

din chaḌh chukā hai mere liye raat hai abhī

ghaḌte haiñ log ab bhī fasāne na.e na.e

jaise ki merī us kī mulāqāt hai abhī

sab ne nayā libās badan par sajā liyā

tanhā huuñ maiñ ki jis kī vahī baat hai abhī

āñdhī uThe ki raah meñ sail-e-balā paḌe

kyā mujh ko fikr tū jo mire saat hai abhī

khilte haiñ roz dil meñ umangoñ ke phuul se

is haath meñ kisī kā hasīñ haat hai abhī

chaltī hai kitnī tez havā dil ke ās-pās

bādal ghire haiñ shiddat-e-jazbāt hai abhī

darkār har galī ko hai ik sail-e-rang-o-bū

kāñToñ kī saare shahr meñ bohtāt hai abhī

sūraj kī aarzū meñ jo karte haiñ rat-jage

un se kaho tasallut-e-zulmāt hai abhī

gum haiñ dil-o-dimāġh to kyā faisla kareñ

apnī nazar meñ sūrat-e-hālāt hai abhī

rakhnā hai sab ke zaḳhm pe marham mujhe magar

merī nazar meñ sirf mirī zaat hai abhī

apnā nasab buland hai ham ḳhvār kyuuñ phireñ

'zulfī' diloñ meñ 'izzat-e-sādāt hai abhī

qalb-o-nazar pe karb ki barsat hai abhi

din chaDh chuka hai mere liye raat hai abhi

ghaDte hain log ab bhi fasane nae nae

jaise ki meri us ki mulaqat hai abhi

sab ne naya libas badan par saja liya

tanha hun main ki jis ki wahi baat hai abhi

aandhi uThe ki rah mein sail-e-bala paDe

kya mujh ko fikr tu jo mere sat hai abhi

khilte hain roz dil mein umangon ke phul se

is hath mein kisi ka hasin hat hai abhi

chalti hai kitni tez hawa dil ke aas-pas

baadal ghire hain shiddat-e-jazbaat hai abhi

darkar har gali ko hai ek sail-e-rang-o-bu

kanTon ki sare shahr mein bohtat hai abhi

suraj ki aarzu mein jo karte hain rat-jage

un se kaho tasallut-e-zulmat hai abhi

gum hain dil-o-dimagh to kya faisla karen

apni nazar mein surat-e-haalat hai abhi

rakhna hai sab ke zaKHm pe marham mujhe magar

meri nazar mein sirf meri zat hai abhi

apna nasab buland hai hum KHwar kyun phiren

'zulfi' dilon mein 'izzat-e-sadat hai abhi