mat puchh ye gham kaisa ye kis baat ka matam

mat pūchh ye ġham kaisā ye kis baat kā mātam

apnoñ kī navāzish hai ye din raat kā mātam

har shaam ko afsos hai Dhalte hue din kā

har sub.h kare kaTtī huī raat kā mātam

chal jā kahīñ tanhā.ī meñ chup-chāp sisak le

is shahr meñ jaa.ez nahīñ jazbāt kā mātam

bajtā hai ġhazal ban meñ tirī jiit kā Dankā

har she'r meñ hotā hai mirī maat kā mātam

jaao kisī shā'ir ko bulā laao kahīñ se

dil kartā hai hotā rahe bin baat kā mātam

jis raat vo ḳhvāboñ kā galā ghoñT rahā thā

jaag uThtā hai har raat usī raat kā mātam

tum aaj ye kahte ho mirī jaan hai 'nāsir'

kal tum bhī manāoge mirī zaat kā mātam

mat puchh ye gham kaisa ye kis baat ka matam

apnon ki nawazish hai ye din raat ka matam

har sham ko afsos hai Dhalte hue din ka

har subh kare kaTti hui raat ka matam

chal ja kahin tanhai mein chup-chap sisak le

is shahr mein jaez nahin jazbaat ka matam

bajta hai ghazal ban mein teri jit ka Danka

har she'r mein hota hai meri mat ka matam

jao kisi sha'ir ko bula lao kahin se

dil karta hai hota rahe bin baat ka matam

jis raat wo KHwabon ka gala ghonT raha tha

jag uThta hai har raat usi raat ka matam

tum aaj ye kahte ho meri jaan hai 'nasir'

kal tum bhi manaoge meri zat ka matam