sukut-e-shab se ajab mashghala nikalta hai

sukūt-e-shab se 'ajab mashġhala nikaltā hai

maiñ tujh ko DhūñDūñ to apnā patā nikaltā hai

umīd-e-vasl meñ sho'le hī haath aa.e haiñ

diye ko chheḌo to bas marsiya nikaltā hai

kitāb kholūñ jo maiñ apne talḳh maazī kī

har ik varaq se nayā hādsa nikaltā hai

'ajīb moḌ pe laa.ī hai ye masāfat-e-dil

jahāñ se jaao vahīñ rāsta nikaltā hai

maiñ chup rahūñ to sulagtī hai ḳhāmushī merī

jo lab hilā.ūñ to phir marsiya nikaltā hai

parakh rahā hai mujhe vo ka.ī zamānoñ se

har ek baar nayā mas.ala nikaltā hai

'ajīb shor hai yādoñ kī is havelī meñ

ḳhamoshiyoñ se bhī ik qahqaha nikaltā hai

ye merī aañkh ke sahrā kī pyaas hai shāyad

ki har sarāb se ik rāsta nikaltā hai

sukut-e-shab se 'ajab mashghala nikalta hai

main tujh ko DhunDun to apna pata nikalta hai

umid-e-wasl mein sho'le hi hath aae hain

diye ko chheDo to bas marsiya nikalta hai

kitab kholun jo main apne talKH mazi ki

har ek waraq se naya hadsa nikalta hai

'ajib moD pe lai hai ye masafat-e-dil

jahan se jao wahin rasta nikalta hai

main chup rahun to sulagti hai KHamushi meri

jo lab hilaun to phir marsiya nikalta hai

parakh raha hai mujhe wo kai zamanon se

har ek bar naya masala nikalta hai

'ajib shor hai yaadon ki is haweli mein

KHamoshiyon se bhi ek qahqaha nikalta hai

ye meri aankh ke sahra ki pyas hai shayad

ki har sarab se ek rasta nikalta hai