kis rut ke muntazir hain ye peD raston par

kis rut ke muntazir haiñ ye peḌ rāstoñ par

ḳhud dhuup meñ khaḌe haiñ saaya musāfiroñ par

miTTī jamī huī thī jab coat ke kafoñ par

hairat huī thī mujh ko logoñ ke qahqahoñ par

bhīge hue añdhere aaseb ban gaye the

dil nāchne lagā thā barsāt kī dafoñ par

maanī thiiñ merī bāteñ us ne bigaḌ bigaḌ ke

kyā kyā mahal hue the tā'mīr abruoñ par

phūTī hai ik kiran sī be-nūr bādaloñ se

maiñ hañs paḌā huuñ shāyad apne hī āñsuoñ par

āñkhoñ kī putliyoñ ne tasvīr tak na dekhī

abr-e-karam na barsā sūkhe hue laboñ par

naav ulaT ga.ī hai taḳhte bikhar gaye haiñ

chhā.ī hai murdanī sī TuuTī huī safoñ par

puḳhta chhateñ thiiñ jin kī āñgan the sāf-suthre

girne lagīñ chaTāneñ aa aa ke un gharoñ par

vīrāniyoñ ke jangal shāyad hare-bhare hoñ

ab jhāḌiyāñ ugī haiñ ābād rāstoñ par

dīvār par basantī beleñ chaḌhī huī haiñ

sabza ugā huā hai baiThī huī chhatoñ par

jangal ke is safar ne behāl kar diyā hai

maiñ ḳhaak Dāltā huuñ guzre hue dinoñ par

ghar meñ udaas phirnā āsān ho gayā hai

yā tang ho gaye haiñ raste musāfiroñ par

ye aur baat āñkheñ miTTī se bhar ga.ī haiñ

dekhe haiñ chand chehre jaatī huī basoñ par

'shahzād' be-dilī kā afsāna keh rahī hai

phailī huī siyāhī likkhe hue ḳhatoñ par

kis rut ke muntazir hain ye peD raston par

KHud dhup mein khaDe hain saya musafiron par

miTTi jami hui thi jab coat ke kafon par

hairat hui thi mujh ko logon ke qahqahon par

bhige hue andhere aaseb ban gaye the

dil nachne laga tha barsat ki dafon par

mani thin meri baaten us ne bigaD bigaD ke

kya kya mahal hue the ta'mir abruon par

phuTi hai ek kiran si be-nur baadalon se

main hans paDa hun shayad apne hi aansuon par

aankhon ki putliyon ne taswir tak na dekhi

abr-e-karam na barsa sukhe hue labon par

naw ulaT gai hai taKHte bikhar gaye hain

chhai hai murdani si TuTi hui safon par

puKHta chhaten thin jin ki aangan the saf-suthre

girne lagin chaTanen aa aa ke un gharon par

viraniyon ke jangal shayad hare-bhare hon

ab jhaDiyan ugi hain aabaad raston par

diwar par basanti belen chaDhi hui hain

sabza uga hua hai baiThi hui chhaton par

jangal ke is safar ne behaal kar diya hai

main KHak Dalta hun guzre hue dinon par

ghar mein udas phirna aasan ho gaya hai

ya tang ho gaye hain raste musafiron par

ye aur baat aankhen miTTi se bhar gai hain

dekhe hain chand chehre jati hui bason par

'shahzad' be-dili ka afsana keh rahi hai

phaili hui siyahi likkhe hue KHaton par