qais jangal mein akela hai mujhe jaane do

qais jañgal meñ akelā hai mujhe jaane do

ḳhuub guzregī jo mil baiTheñge dīvāne do

laal Dore tirī āñkhoñ meñ jo dekhe to khulā

mai-e-gul-rañg se labrez haiñ paimāne do

Thahro tevrī ko chaḌhā.e hue jaate ho kidhar

dil kā sadqa to abhī sar se utar jaane do

man.a kyuuñ karte ho ishq-e-but-e-shīrīñ-lab se

kyā maze kā hai ye ġham dosto ġham khāne do

ham bhī manzil pe pahuñch jā.eñge marte khapte

qāfila yāroñ kā jaatā hai agar jaane do

sham o parvāna na mahfil meñ hoñ bāham zinhār

sham.a-rū ne mujhe bheje haiñ ye parvāne do

ek aalam nazar aa.egā giraftār tumheñ

apne gesū-e-rasā tā-ba-kamar jaane do

saḳht-jānī se maiñ aarī huuñ nihāyat ai 'talḳh'

paḌ ga.e haiñ tirī shamshīr meñ dandāne do

hashr meñ pesh-e-ḳhudā faisla is kā hogā

zindagī meñ mujhe us gabr ko tarsāne do

gar mohabbat hai to vo mujh se phiregā na kabhī

ġham nahīñ hai mujhe ġhammāz ko bhaḌkāne do

josh-e-bārish hai abhī thamte ho kyā ai ashko

dāman-e-koh-o-bayābāñ ko to bhar jaane do

vā.izoñ ko na kare man.a nasīhat se koī

maiñ na samjhūñgā kisī tarah se samjhāne do

rañj detā hai jo vo paas na jaao 'sayyāh'

maano kahne ko mire duur karo jaane do

qais jangal mein akela hai mujhe jaane do

KHub guzregi jo mil baiThenge diwane do

lal Dore teri aankhon mein jo dekhe to khula

mai-e-gul-rang se labrez hain paimane do

Thahro tewri ko chaDhae hue jate ho kidhar

dil ka sadqa to abhi sar se utar jaane do

mana kyun karte ho ishq-e-but-e-shirin-lab se

kya maze ka hai ye gham dosto gham khane do

hum bhi manzil pe pahunch jaenge marte khapte

qafila yaron ka jata hai agar jaane do

sham o parwana na mahfil mein hon baham zinhaar

shama-ru ne mujhe bheje hain ye parwane do

ek aalam nazar aaega giraftar tumhein

apne gesu-e-rasa ta-ba-kamar jaane do

saKHt-jaani se main aari hun nihayat ai 'talKH'

paD gae hain teri shamshir mein dandane do

hashr mein pesh-e-KHuda faisla is ka hoga

zindagi mein mujhe us gabr ko tarsane do

gar mohabbat hai to wo mujh se phirega na kabhi

gham nahin hai mujhe ghammaz ko bhaDkane do

josh-e-barish hai abhi thamte ho kya ai ashko

daman-e-koh-o-bayaban ko to bhar jaane do

waizon ko na kare mana nasihat se koi

main na samjhunga kisi tarah se samjhane do

ranj deta hai jo wo pas na jao 'sayyah'

mano kahne ko mere dur karo jaane do