aap chaliye to sahi hum bhi chale aate hain

aap chaliye to sahī ham bhī chale aate haiñ

aap har baar yahī keh ke chale jaate haiñ

kisī ahbāb se ummīd koī kyā maiñ rakhūñ

vo kahāñ mere masā.il ko samajh paate haiñ

zindagī ham tire qaidī haiñ rihā ham ko na kar

ham judā.ī ke tasavvur se hī ghabrāte haiñ

baat pechīda kiye jaatī hai uljhan apnī

aap jab duur biThā kar hameñ samjhāte haiñ

vaqt achchhā ho to phūloñ se mahaktī hai sabā

jo burā vaqt ho to phuul bhī murjhāte haiñ

ham ne maanā tirī duniyā ke nazāre haiñ hasīn

kuchh bhī ho ham tire jhāñse meñ nahīñ aate haiñ

dhuup jo tez ho to ḳhud ko bachāne ke liye

ham 'umūman tire saa.e se lipaT jaate haiñ

aap chaliye to sahi hum bhi chale aate hain

aap har bar yahi keh ke chale jate hain

kisi ahbab se ummid koi kya main rakhun

wo kahan mere masail ko samajh pate hain

zindagi hum tere qaidi hain riha hum ko na kar

hum judai ke tasawwur se hi ghabraate hain

baat pechida kiye jati hai uljhan apni

aap jab dur biTha kar hamein samjhate hain

waqt achchha ho to phulon se mahakti hai saba

jo bura waqt ho to phul bhi murjhate hain

hum ne mana teri duniya ke nazare hain hasin

kuchh bhi ho hum tere jhanse mein nahin aate hain

dhup jo tez ho to KHud ko bachane ke liye

hum 'umuman tere sae se lipaT jate hain