uski aankhon ke darichon mein utar jaana hai

us kī āñkhoñ ke darīchoñ meñ utar jaanā hai

jaam kā jaam hai mai-ḳhāne kā mai-ḳhāna hai

jān-e-jānāñ ke hasīñ jalve haiñ tanhā.ī bhī

bazm kī bazm hai vīrāne kā vīrāna hai

bhuul kar bhī tirī galiyoñ meñ na rakkheñge qadam

ḳhauf kā ḳhauf hai afsāne kā afsāna hai

āñkhoñ āñkhoñ meñ huī baat koī kyā jaane

raaz kā raaz hai nazrāne kā nazrāna hai

tere dīdār ko yuuñ merī tarastī hai nazar

pyaas kī pyaas hai paimāne kā paimāna hai

be-ḳhudī dil kī bikharne nahīñ detī mujh ko

'ishq kā 'ishq hai dīvāne kā dīvāna hai

bas ġham-e-yār ne tujh ko hai sañbhālā 'amjad'

ḳhauf-e-tanhā.ī se varna tujhe mar jaanā hai

us ki aankhon ke darichon mein utar jaana hai

jam ka jam hai mai-KHane ka mai-KHana hai

jaan-e-jaanan ke hasin jalwe hain tanhai bhi

bazm ki bazm hai virane ka virana hai

bhul kar bhi teri galiyon mein na rakkhenge qadam

KHauf ka KHauf hai afsane ka afsana hai

aankhon aankhon mein hui baat koi kya jaane

raaz ka raaz hai nazrane ka nazrana hai

tere didar ko yun meri tarasti hai nazar

pyas ki pyas hai paimane ka paimana hai

be-KHudi dil ki bikharne nahin deti mujh ko

'ishq ka 'ishq hai diwane ka diwana hai

bas gham-e-yar ne tujh ko hai sanbhaala 'amjad'

KHauf-e-tanhai se warna tujhe mar jaana hai