thalon mein chashma-e-barfab ki tarah hun main

thaloñ meñ chashma-e-barfāb kī tarah huuñ maiñ

ḳhud apne vāste ik ḳhvāb kī tarah huuñ maiñ

nikal chukā huuñ maiñ tujh se magar mire dariyā

ab ek māhī-e-be-āb kī tarah huuñ maiñ

mire baġhair tashaḳhḳhus tirā bhī hai mashkūk

tū lafz hai tire e'rāb kī tarah huuñ maiñ

ḳhush-āmdīd baġhair imtiyāz-e-nasl-o-zabāñ

mizāj-e-ḳhitta-e-punjab kī tarah huuñ maiñ

koī bhī shakl ho maiñ raushnī bikhertā huuñ

kabhī diye kabhī mehrāb kī tarah huuñ maiñ

mujhe girift meñ rakh mujh ko chāhne vaale

tū jāntā hai ki sīmāb kī tarah huuñ maiñ

raqīb paḌh na sakegā tirī kitāb-e-hayāt

ki us meñ ek hasīñ baab kī tarah huuñ maiñ

mujhe bhī yaad hai bachpan kī ranjishoñ kī tarah

vo shaḳhs jis ke liye ḳhvāb kī tarah huuñ maiñ

'zahīr' vo mirī ik lahr ko taras rahe haiñ

jinheñ gila thā ki sailāb kī tarah huuñ maiñ

thalon mein chashma-e-barfab ki tarah hun main

KHud apne waste ek KHwab ki tarah hun main

nikal chuka hun main tujh se magar mere dariya

ab ek mahi-e-be-ab ki tarah hun main

mere baghair tashaKHKHus tera bhi hai mashkuk

tu lafz hai tere e'rab ki tarah hun main

KHush-amdid baghair imtiyaz-e-nasl-o-zaban

mizaj-e-KHitta-e-punjab ki tarah hun main

koi bhi shakl ho main raushni bikherta hun

kabhi diye kabhi mehrab ki tarah hun main

mujhe girift mein rakh mujh ko chahne wale

tu jaanta hai ki simab ki tarah hun main

raqib paDh na sakega teri kitab-e-hayat

ki us mein ek hasin bab ki tarah hun main

mujhe bhi yaad hai bachpan ki ranjishon ki tarah

wo shaKHs jis ke liye KHwab ki tarah hun main

'zahir' wo meri ek lahr ko taras rahe hain

jinhen gila tha ki sailab ki tarah hun main