ye jo likkha hai mujhe ye jo miTaya hai mujhe

ye jo likkhā hai mujhe ye jo miTāyā hai mujhe

na sahī aur tamāshā to banāyā hai mujhe

koī tīr-o-tabar apnā bhī nikālā hotā

mere hī aslaha se us ne Darāyā hai mujhe

jaise ye sab haiñ isī tarh kā ho jā.ūñ agar

baiThe baiThe ye ḳhayāl aaj hī aayā hai mujhe

'aib rakhtā huuñ ki āḳhir ye hunar hai merā

dhuup merī hai yahī aur yahī saayā hai mujhe

taaki maiñ kuchh na kahūñ vaz' kī majbūrī meñ

is liye masnad-e-aivāñ pe biThāyā hai mujhe

sar-e-taslīm huuñ jis taur jhukāyā mujh ko

dast-e-tā.īd huuñ jis rang uThāyā hai mujhe

maiñ huuñ vo ḳhuuñ ki bahāyā hai mujhe saḌkoñ par

maiñ huuñ vo rang ki chehroñ se uḌāyā hai mujhe

phaḌphaḌātā huuñ abhī zor-e-havā meñ ruḳh par

na uThāyā hai abhī aur na girāyā hai mujhe

maiñ ki is 'ahd meñ munkir huuñ 'zafar' apnā bhī

kis liye mahfil-e-ġhālib meñ bulāyā hai mujhe

ye jo likkha hai mujhe ye jo miTaya hai mujhe

na sahi aur tamasha to banaya hai mujhe

koi tir-o-tabar apna bhi nikala hota

mere hi aslaha se us ne Daraya hai mujhe

jaise ye sab hain isi tarh ka ho jaun agar

baiThe baiThe ye KHayal aaj hi aaya hai mujhe

'aib rakhta hun ki aaKHir ye hunar hai mera

dhup meri hai yahi aur yahi saya hai mujhe

taki main kuchh na kahun waz' ki majburi mein

is liye masnad-e-aiwan pe biThaya hai mujhe

sar-e-taslim hun jis taur jhukaya mujh ko

dast-e-taid hun jis rang uThaya hai mujhe

main hun wo KHun ki bahaya hai mujhe saDkon par

main hun wo rang ki chehron se uDaya hai mujhe

phaDphaData hun abhi zor-e-hawa mein ruKH par

na uThaya hai abhi aur na giraya hai mujhe

main ki is 'ahd mein munkir hun 'zafar' apna bhi

kis liye mahfil-e-ghaalib mein bulaya hai mujhe