ye dard ka mausam hai phir sina-dari mango

ye dard kā mausam hai phir sīna-darī māñgo

kuchh aur junūñ vaalo āshufta-sarī māñgo

jab chaak hī honā har dāman kā muqaddar hai

phir jeb-e-darīda se kyuuñ baḳhiya-garī māñgo

āñkhoñ ke darīchoñ se dar aate haiñ dard-o-ġham

bachnā hai luTeroñ se to be-basarī māñgo

ā.īnoñ kī qismat meñ to ḳhud-shikanī thī hī

faulād kī fitrat se tum ḳhud-nigarī māñgo

ab misr meñ yūsuf ke bhī daam nahīñ lagte

nā-qadroñ kī is duniyā meñ be-hunarī māñgo

aivānoñ pe to shab ke saa.e hī musallat haiñ

zindānoñ ke rauzan se nūr-e-saharī māñgo

miltī hai qafas se bhī parvāz kī had aksar

daane kī havas vaalo be-bāl-o-parī māñgo

taslīm kī tauhīñ hai nādāno du'ā ḳhud hī

'ādat hai du'āoñ kī to be-asarī māñgo

khelo abhī tāroñ se dil chāñd se bahlāo

bachche ho na bachpan meñ bāliġh-nazarī māñgo

har hādsa dīvār-o-dar hī se hai vābasta

mahloñ ke parastāro be-bām-o-darī māñgo

yuuñ bujhte charāġhoñ kī lau tez nahīñ hotī

Dhalte hue sāyoñ se sho'la-nigarī māñgo

ye ḳhār-o-gul-o-sho'la sab vahm hai nazroñ kā

arbāb-e-basīrat se kuchh dīda-varī māñgo

kanjūs tahī-dāman duniyā tumheñ kyā degī

māñgo jo 'na.īmī' to āh-e-saharī māñgo

ye dard ka mausam hai phir sina-dari mango

kuchh aur junun walo aashufta-sari mango

jab chaak hi hona har daman ka muqaddar hai

phir jeb-e-darida se kyun baKHiya-gari mango

aankhon ke darichon se dar aate hain dard-o-gham

bachna hai luTeron se to be-basari mango

aainon ki qismat mein to KHud-shikani thi hi

faulad ki fitrat se tum KHud-nigari mango

ab misr mein yusuf ke bhi dam nahin lagte

na-qadron ki is duniya mein be-hunari mango

aiwanon pe to shab ke sae hi musallat hain

zindanon ke rauzan se nur-e-sahari mango

milti hai qafas se bhi parwaz ki had aksar

dane ki hawas walo be-baal-o-pari mango

taslim ki tauhin hai nadano du'a KHud hi

'adat hai du'aon ki to be-asari mango

khelo abhi taron se dil chand se bahlao

bachche ho na bachpan mein baaligh-nazari mango

har hadsa diwar-o-dar hi se hai wabasta

mahlon ke parastaro be-baam-o-dari mango

yun bujhte charaghon ki lau tez nahin hoti

Dhalte hue sayon se sho'la-nigari mango

ye KHar-o-gul-o-sho'la sab wahm hai nazron ka

arbab-e-basirat se kuchh dida-wari mango

kanjus tahi-daman duniya tumhein kya degi

mango jo 'naimi' to aah-e-sahari mango