sina-sipar hain zulm ki talwar ke liye

sīna-sipar haiñ zulm kī talvār ke liye

paidā hue haiñ ham rasan-o-dār ke liye

jis meñ sakat nahīñ hai vo haT jaa.e raah se

āñdhī uThī hai shahr kī dīvār ke liye

is hādse meñ saarī hī bastī sharīk thī

do chaar naam ḳhaas the aḳhbār ke liye

likhte rahe lahū se tire ġham kī dāstāñ

jalte rahe charāġh shab-e-tār ke liye

ham kyā kaheñ ki vaqt ke māthe kī jhurriyāñ

goyā zabāñ haiñ dard ke iz.hār ke liye

paanī ne chāroñ or se masdūd kar diyā

rasta na mil sakā koī us paar ke liye

Duubā huuñ sāhiloñ kī udāsī ko dekh kar

tūfāñ uThe na mujh se subuksār ke liye

ham ne to apne ġham se javānī nikhār lī

ham ko to apnā ġham hī milā pyaar ke liye

daftar ke qaid-o-band meñ jakḌe hue haiñ din

rāteñ haiñ vaqf zikr-e-ġham-e-yār ke liye

college se us ko aaj bhī chhuTTī na mil sakī

kitne hasīn ḳhvāb the itvār ke liye

'zulfī' hamāre daur meñ kyā us kī ahmiyat

vo shā'irī jo vaqf thī darbār ke liye

sina-sipar hain zulm ki talwar ke liye

paida hue hain hum rasan-o-dar ke liye

jis mein sakat nahin hai wo haT jae rah se

aandhi uThi hai shahr ki diwar ke liye

is hadse mein sari hi basti sharik thi

do chaar nam KHas the aKHbar ke liye

likhte rahe lahu se tere gham ki dastan

jalte rahe charagh shab-e-tar ke liye

hum kya kahen ki waqt ke mathe ki jhurriyan

goya zaban hain dard ke izhaar ke liye

pani ne chaaron or se masdud kar diya

rasta na mil saka koi us par ke liye

Duba hun sahilon ki udasi ko dekh kar

tufan uThe na mujh se subuksar ke liye

hum ne to apne gham se jawani nikhaar li

hum ko to apna gham hi mila pyar ke liye

daftar ke qaid-o-band mein jakDe hue hain din

raaten hain waqf zikr-e-gham-e-yar ke liye

college se us ko aaj bhi chhuTTi na mil saki

kitne hasin KHwab the itwar ke liye

'zulfi' hamare daur mein kya us ki ahmiyat

wo sha'iri jo waqf thi darbar ke liye