pyar ka lafz pasheman nazar aata hai

pyaar kā lafz pashemān nazar aatā hai

aaj har aa.ina hairān nazar aatā hai

yuuñ to kahne ko hai vo merā masīhā lekin

mere dukh dard se anjān nazar aatā hai

majma’-e-‘ām ne badle haiñ jo tevar apne

is se vo shaḳhs pareshān nazar aatā hai

har-sū mazlūm kī chīḳheñ haiñ lahū ke chhīñTe

jo bhī manzar hai vo vīrān nazar aatā hai

ḳhushbū iḳhlās kī mahsūs nahīñ hotī kahīñ

dil kī barbādī kā sāmān nazar aatā hai

bech detā hai jo aslāf kī hurmat 'e'jāz'

aisā bhī fāḳhir-e-īmān nazar aatā hai

pyar ka lafz pasheman nazar aata hai

aaj har aaina hairan nazar aata hai

yun to kahne ko hai wo mera masiha lekin

mere dukh dard se anjaan nazar aata hai

majma’-e-‘am ne badle hain jo tewar apne

is se wo shaKHs pareshan nazar aata hai

har-su mazlum ki chiKHen hain lahu ke chhinTe

jo bhi manzar hai wo viran nazar aata hai

KHushbu iKHlas ki mahsus nahin hoti kahin

dil ki barbaadi ka saman nazar aata hai

bech deta hai jo aslaf ki hurmat 'e'jaz'

aisa bhi faKHir-e-iman nazar aata hai