ponchh kar ashk gharibon ko hansane wale

poñchh kar ashk ġharīboñ ko hañsāne vaale

ab kahāñ milte haiñ vo ūñche gharāne vaale

ab to har moḌ pe hotā hai tamāshā har din

ab to har baat pe hairāñ haiñ zamāne vaale

tere āñgan ko ḳhudā yuuñ hī charāġhāñ rakkhe

mere ḳhvāboñ ke charāġhoñ ko bujhāne vaale

tere chehre kī jhalak paane ko be-tāb hai dil

tere jaisī tirī tasvīr banāne vaale

kyā kabhī lauT ke aate haiñ vo pyāre chehre

tapte sahrā meñ mujhe chhoḌ ke jaane vaale

mere dīdār ko ik roz bahut tarsegā

zindagī bhar ke liye chhoḌ ke jaane vaale

aap dil thaam ke baiThe raho mahfil meñ abhī

aaj 'vāris' haiñ ġhazal apnī sunāne vaale

ponchh kar ashk gharibon ko hansane wale

ab kahan milte hain wo unche gharane wale

ab to har moD pe hota hai tamasha har din

ab to har baat pe hairan hain zamane wale

tere aangan ko KHuda yun hi charaghan rakkhe

mere KHwabon ke charaghon ko bujhane wale

tere chehre ki jhalak pane ko be-tab hai dil

tere jaisi teri taswir banane wale

kya kabhi lauT ke aate hain wo pyare chehre

tapte sahra mein mujhe chhoD ke jaane wale

mere didar ko ek roz bahut tarsega

zindagi bhar ke liye chhoD ke jaane wale

aap dil tham ke baiThe raho mahfil mein abhi

aaj 'waris' hain ghazal apni sunane wale