fasurda shaKHs agarche gharib-o-sada hai

fasurda shaḳhs agarche ġharīb-o-sāda hai

tumhāre zarf kī vus'at se kuchh ziyāda hai

hai shāh-māt yaqīnī ise baḌhā.ūñ agar

mirī bisāt kā jo āḳhrī piyāda hai

rafāqatoñ kī tamannā vabāl-e-jāñ hai magar

ye guzre vasl ga.e hijr kā i'āda hai

ba-sad-yaqīn mukammal huā jo lamhoñ meñ

vo chehra sūrat-e-imkān se bhī aadhā hai

sipāh-e-shām use bhī na noch le 'az.har'

shikasta-lāsh kā jo āḳhrī labāda hai

fasurda shaKHs agarche gharib-o-sada hai

tumhaare zarf ki wus'at se kuchh ziyaada hai

hai shah-mat yaqini ise baDhaun agar

meri bisat ka jo aaKHri piyaada hai

rafaqaton ki tamanna wabaal-e-jaan hai magar

ye guzre wasl gae hijr ka i'ada hai

ba-sad-yaqin mukammal hua jo lamhon mein

wo chehra surat-e-imkan se bhi aadha hai

sipah-e-sham use bhi na noch le 'azhar'

shikasta-lash ka jo aaKHri labaada hai