qissa-e-naql kuchh aisa hai batae na bane

qissa-e-naql kuchh aisā hai batā.e na bane

baat bigḌī hai kuchh aisī ki banā.e na bane

imtihāñ haal meñ ham laa.e haiñ ik aisī kitāb

mumtahin pūchhe ye kyā hai to chhupā.e na bane

in kitāboñ se hai pīchhā bhī chhuḌānā mushkil

aur ye bojh bhī ab ham se uThā.e na bane

kyā kareñ khel meñ kam-baḳht kashish hai aisī

jis se dil apnā haTā.eñ to haTā.e na bane

sub.h ko aañkh bhī khultī nahīñ jaldī apnī

der ho jaa.e to schōl bhī jaa.e na bane

ghar se bhī cinema jaane kī ijāzat na milī

aur schōl se bhī bhaag ke aa.e na bane

'kaif' ḳhāmosh rahā bhī nahīñ jaatā mujh se

aur darje meñ ġhazal gaa.eñ to gaa.e na bane

qissa-e-naql kuchh aisa hai batae na bane

baat bigDi hai kuchh aisi ki banae na bane

imtihan haal mein hum lae hain ek aisi kitab

mumtahin puchhe ye kya hai to chhupae na bane

in kitabon se hai pichha bhi chhuDana mushkil

aur ye bojh bhi ab hum se uThae na bane

kya karen khel mein kam-baKHt kashish hai aisi

jis se dil apna haTaen to haTae na bane

subh ko aankh bhi khulti nahin jaldi apni

der ho jae to school bhi jae na bane

ghar se bhi cinema jaane ki ijazat na mili

aur school se bhi bhag ke aae na bane

'kaif' KHamosh raha bhi nahin jata mujh se

aur darje mein ghazal gaen to gae na bane