ek naya hai bab ye tariKH ke abwab mein

ik nayā hai baab ye tārīḳh ke abvāb meñ

pā gaye ham dushmanoñ se luT gaye ahbāb meñ

hone do dushman ko shāmil halqa-e-ahbāb meñ

ek qatre kī haqīqat kyā hai ik tālāb meñ

aañkh hai nikhrī huī sī āñsuoñ meñ Duub kar

is safīne kā muqaddar jaag uThā sailāb meñ

'aks-e-ruḳh hai jaam meñ bhī jaam ke atrāf bhī

muntazir aisā hai jaise jaam ho mahtāb meñ

baat to jab hai ki āñkhoñ meñ ik aañsū bhī na ho

zabt-e-ġham pahlā adab hai 'ishq ke ādāb meñ

roz-e-avval se luTātā aa rahā hai raushnī

phir bhī farq aayā na kuchh sūraj kī āb-o-tāb meñ

is tarah ham ne shab-e-vā'da guzārī ai 'adīl'

sham' is mehrāb se rakh dī hai us mehrāb meñ

ek naya hai bab ye tariKH ke abwab mein

pa gaye hum dushmanon se luT gaye ahbab mein

hone do dushman ko shamil halqa-e-ahbab mein

ek qatre ki haqiqat kya hai ek talab mein

aankh hai nikhri hui si aansuon mein Dub kar

is safine ka muqaddar jag uTha sailab mein

'aks-e-ruKH hai jam mein bhi jam ke atraf bhi

muntazir aisa hai jaise jam ho mahtab mein

baat to jab hai ki aankhon mein ek aansu bhi na ho

zabt-e-gham pahla adab hai 'ishq ke aadab mein

roz-e-awwal se luTata aa raha hai raushni

phir bhi farq aaya na kuchh suraj ki aab-o-tab mein

is tarah hum ne shab-e-wa'da guzari ai 'adil'

sham' is mehrab se rakh di hai us mehrab mein