diwangi shikasta-dili iztirab dukh

dīvāngī shikasta-dilī iztirāb dukh

har ik savāl-e-'ishq kā sīdhā javāb dukh

yādash-ba-ḳhair us ne kahā thā ki ḳhush raho

vaqt-e-vidā' phir bhī huā be-hisāb dukh

maanā ki us ke vasl meñ kaif-o-surūr hai

lekin vo shām-e-hijr kā misl-e-'azāb dukh

fikr-e-ma'āsh yād-e-butāñ karb-e-rozgār

sinn-e-shu'ūr zulm hai 'ahd-e-shabāb dukh

vo jis kā ek lafz bhī lab par na aa sakā

us dāstān-e-dil kā hai lubb-e-lubāb dukh

tere jilau meñ maut bhī sarmāya-e-hayāt

tere baġhair ziist kā har ek baab dukh

varna junūn-e-shauq koī kyuuñ kare qubūl

raas aa gayā hai mujh ko mirā dastyāb dukh

'sāqib' kal apnī niiñd kā kuchh aisā haal thā

jaise sukūt-e-shab kī hai tā'bīr-e-ḳhvāb dukh

diwangi shikasta-dili iztirab dukh

har ek sawal-e-'ishq ka sidha jawab dukh

yaadash-ba-KHair us ne kaha tha ki KHush raho

waqt-e-wida' phir bhi hua be-hisab dukh

mana ki us ke wasl mein kaif-o-surur hai

lekin wo sham-e-hijr ka misl-e-'azab dukh

fikr-e-ma'ash yaad-e-butan karb-e-rozgar

sinn-e-shu'ur zulm hai 'ahd-e-shabab dukh

wo jis ka ek lafz bhi lab par na aa saka

us dastan-e-dil ka hai lubb-e-lubab dukh

tere jilau mein maut bhi sarmaya-e-hayat

tere baghair zist ka har ek bab dukh

warna junun-e-shauq koi kyun kare qubul

ras aa gaya hai mujh ko mera dastyab dukh

'saqib' kal apni nind ka kuchh aisa haal tha

jaise sukut-e-shab ki hai ta'bir-e-KHwab dukh