bayan-e-shauq mein nazuk maqamon se guzarna hai

bayān-e-shauq meñ nāzuk maqāmoñ se guzarnā hai

mujhe tere sukūt-e-nāz se kuchh 'arz karnā hai

na jiine kī tarah jiinā na marne kī tarah marnā

ye jiinā koī jiinā hai ye marnā koī marnā hai

na samjheñ harf-e-āḳhir aaj ke daur-e-tamaddun ko

bahut kuchh nazm-e-insānī ko banñā hai sañvarnā hai

magar vo baat kyā hai 'umr bhar khulne nahīñ paayā

yahī sochā kiyā tujh se mujhe kuchh baat karnā hai

ye maanā zindagī hai naam aage baḌhte rahne kā

isī halchal meñ mujh ko tujh se do ik baat karnā hai

'ibārat hai ye duniyā kuchh lakīroñ kuchh sadāoñ se

yahāñ kuchh rang bharnā hai vahāñ kuchh dard bharnā hai

'firāq' auroñ ko sat.h-e-zindagī se khel lene do

hamārī shā'irī ko aur hī kuchh kaam karnā hai

bayan-e-shauq mein nazuk maqamon se guzarna hai

mujhe tere sukut-e-naz se kuchh 'arz karna hai

na jine ki tarah jina na marne ki tarah marna

ye jina koi jina hai ye marna koi marna hai

na samjhen harf-e-aKHir aaj ke daur-e-tamaddun ko

bahut kuchh nazm-e-insani ko banna hai sanwarna hai

magar wo baat kya hai 'umr bhar khulne nahin paya

yahi socha kiya tujh se mujhe kuchh baat karna hai

ye mana zindagi hai nam aage baDhte rahne ka

isi halchal mein mujh ko tujh se do ek baat karna hai

'ibarat hai ye duniya kuchh lakiron kuchh sadaon se

yahan kuchh rang bharna hai wahan kuchh dard bharna hai

'firaq' auron ko sath-e-zindagi se khel lene do

hamari sha'iri ko aur hi kuchh kaam karna hai