asar se hain tahi-nale tasarruf se hain dam Khaali

asar se haiñ tahī-nāle tasarruf se haiñ dam ḳhālī

niyastāñ ho ga.e sheroñ se yā-rab yak qalam ḳhālī

nazar aayā bhī ahvāl-e-jahāñ us meñ to kyā hāsil

jo dil meñ naqsh hai apne hai us se jām-e-jam ḳhālī

kudūrat se zamāne kī ba-rang-e-shīsha-e-sā'at

mile hamdard agar koī to kiije dil baham ḳhālī

tahī-dastī hamārī dekh chashm-e-kam se mat mun'im

ki hai ye haath shakl-e-kīsa-e-ahl-e-karam ḳhālī

kahīñ jaanā hai to hastī se jā ūdhar ko ai 'saudā'

ḳhalal se raah pāvegā na juz rāh-e-'adam ḳhālī

asar se hain tahi-nale tasarruf se hain dam KHali

niyastan ho gae sheron se ya-rab yak qalam KHali

nazar aaya bhi ahwal-e-jahan us mein to kya hasil

jo dil mein naqsh hai apne hai us se jam-e-jam KHali

kudurat se zamane ki ba-rang-e-shisha-e-sa'at

mile hamdard agar koi to kije dil baham KHali

tahi-dasti hamari dekh chashm-e-kam se mat mun'im

ki hai ye hath shakl-e-kisa-e-ahl-e-karam KHali

kahin jaana hai to hasti se ja udhar ko ai 'sauda'

KHalal se rah pawega na juz rah-e-'adam KHali