ek hi rang rachaun sab insanon mein

ek hī rang rachā.ūñ sab insānoñ meñ

dauḌ rahā huuñ duniyā kī shiryānoñ meñ

nafrat kī tā.īd nahīñ maiñ kar saktā

naam mirā bhī likh lo nā-farmānoñ meñ

bāhar to har sū hai raaj darindoñ kā

amn kā hai māhaul faqat zindānoñ meñ

paudā paudā paal ke vaqt na zaa.e' kar

kāġhaz ke kuchh phuul sajā guldānoñ meñ

is be-kār ke jiine se bezār huuñ maiñ

shāmil kar lo mujh ko bhī parvānoñ meñ

yaaro maiñ to yuuñ bhī gaalī khā lūñgā

chhoḌo bhī kyā rakkhā hai yārānoñ meñ

insānoñ kā ḳhuun hī tum ko piinā hai

khopḌiyoñ meñ pī lo yā paimānoñ meñ

raat kī chup meñ dil kī dhaḌkan tez karo

koī to āvāz paḌegī kānoñ meñ

pahle hī ye gorā hai ye kaalā hai

aur hameñ bāñToge kitne ḳhānoñ meñ

sirf havā kī chaap sunā.ī detī hai

jazboñ kī yalġhār nahīñ tūfānoñ meñ

mujh ko apne des kī miTTī kaafī hai

kyā rakkhā hai nasloñ aur zabānoñ meñ

aaj ke sūraj un ke zehn pe dastak de

so.e haiñ jo maazī ke afsānoñ meñ

kab tak dhokā khaa.e apnī pyaas 'qatīl'

ḳhālī jaam khanakte haiñ mai-ḳhānoñ meñ

ek hi rang rachaun sab insanon mein

dauD raha hun duniya ki shiryanon mein

nafrat ki taid nahin main kar sakta

nam mera bhi likh lo na-farmanon mein

bahar to har su hai raj darindon ka

amn ka hai mahaul faqat zindanon mein

pauda pauda pal ke waqt na zae' kar

kaghaz ke kuchh phul saja guldanon mein

is be-kar ke jine se bezar hun main

shamil kar lo mujh ko bhi parwanon mein

yaro main to yun bhi gali kha lunga

chhoDo bhi kya rakkha hai yaranon mein

insanon ka KHun hi tum ko pina hai

khopDiyon mein pi lo ya paimanon mein

raat ki chup mein dil ki dhaDkan tez karo

koi to aawaz paDegi kanon mein

pahle hi ye gora hai ye kala hai

aur hamein banToge kitne KHanon mein

sirf hawa ki chap sunai deti hai

jazbon ki yalghaar nahin tufanon mein

mujh ko apne des ki miTTi kafi hai

kya rakkha hai naslon aur zabanon mein

aaj ke suraj un ke zehn pe dastak de

soe hain jo mazi ke afsanon mein

kab tak dhoka khae apni pyas 'qatil'

KHali jam khanakte hain mai-KHanon mein