apne ajdad ki tauqir sambhaali humne
apne ajdād kī tauqīr sambhālī ham ne
zindagī ban ke guzārī hai misālī ham ne
kabhī hoñThoñ pe koī shikva nahīñ aane diyā
sūkhī roTī bhī jo khaa.ī to halālī ham ne
amn ke vāste ham ne hī uThāyā thā qalam
gar huī jang to shamshīr uThā lī ham ne
ham ne maidān meñ kitnoñ ko pachhāḌā lekin
kisī dushman kī bhī pagḌī nā uchhālī ham ne
us se milne kī tamannā thī magar phir ik din
apne dil se vo tamannā bhī miTā lī ham ne
us ne ik din hameñ bolā thā ki tum mere ho
us kī vo baat abhī tak nahīñ Taalī ham ne
ham bhī dekheñge kisī roz unheñ ai 'ādil'
dil meñ phir hasrat-e-dīdār sajā lī ham ne
apne ajdad ki tauqir sambhaali hum ne
zindagi ban ke guzari hai misali hum ne
kabhi honThon pe koi shikwa nahin aane diya
sukhi roTi bhi jo khai to halali hum ne
amn ke waste hum ne hi uThaya tha qalam
gar hui jang to shamshir uTha li hum ne
hum ne maidan mein kitnon ko pachhaDa lekin
kisi dushman ki bhi pagDi na uchhaali hum ne
us se milne ki tamanna thi magar phir ek din
apne dil se wo tamanna bhi miTa li hum ne
us ne ek din hamein bola tha ki tum mere ho
us ki wo baat abhi tak nahin Tali hum ne
hum bhi dekhenge kisi roz unhen ai 'adil'
dil mein phir hasrat-e-didar saja li hum ne
Additional information available
Click on the INTERESTING button to view additional information associated with this sher.
About this sher
rare Unpublished content
This ghazal contains ashaar not published in the public domain. These are marked by a red line on the left.
