hui na rah mein hael shikasta-pai meri

huī na raah meñ haa.el shikasta-pā.ī mirī

'qatīl' ab bhī hai ik shaḳhs tak rasā.ī mirī

uchhālte haiñ mire zikr se vo naam apnā

pasand hai mire yāroñ ko har burā.ī mirī

gañvā rahā thā maiñ kitne savāb duniyā ke

janāb-e-'ishq ne kī aa ke peshvā.ī mirī

ab aur logoñ meñ jaa.e vo ġham ġhalat karne

sunā hai us ko gavārā nahīñ judā.ī mirī

hazār baar jo bad-nām kar chukā hai mujhe

phir us kī khoj meñ niklī hai pārsā.ī mirī

bhaTak rahā huuñ maiñ ik manzil-e-ziyāñ ke liye

karoge rāhzano tum hī rahnumā.ī mirī

tamām bhed mirī zindagī ke khol diye

jo mutriba ne kisī ko ġhazal sunā.ī mirī

bas ek baar shikan paḌ ga.ī thī māthe par

manāne mujh ko javānī kabhī na aa.ī mirī

'qatīl' shukr karūñ jab bhī mujh pe tiir chale

ba-faiz-e-'ishq tabī'at hai karbalā.ī mirī

hui na rah mein hael shikasta-pai meri

'qatil' ab bhi hai ek shaKHs tak rasai meri

uchhaalte hain mere zikr se wo nam apna

pasand hai mere yaron ko har burai meri

ganwa raha tha main kitne sawab duniya ke

janab-e-'ishq ne ki aa ke peshwai meri

ab aur logon mein jae wo gham ghalat karne

suna hai us ko gawara nahin judai meri

hazar bar jo bad-nam kar chuka hai mujhe

phir us ki khoj mein nikli hai parsai meri

bhaTak raha hun main ek manzil-e-ziyan ke liye

karoge rahzano tum hi rahnumai meri

tamam bhed meri zindagi ke khol diye

jo mutriba ne kisi ko ghazal sunai meri

bas ek bar shikan paD gai thi mathe par

manane mujh ko jawani kabhi na aai meri

'qatil' shukr karun jab bhi mujh pe tir chale

ba-faiz-e-'ishq tabi'at hai karbalai meri