نثار یوں تو ہوا تجھ پہ نقد جاں کیا کیا

نثار یوں تو ہوا تجھ پہ نقد جاں کیا کیا

مگر رہا بھی ترا حسن سرگراں کیا کیا

الگ الگ بھی بہت دل فریب نکلے گی

کہیں گے لوگ ابھی تیری داستاں کیا کیا

حساب مے ہے حریفان بادہ پیما سے

اٹھے گا اب کے رگ تاک سے دھواں کیا کیا

نفس کی رو میں کوئی پیچ و تاب دریا تھا

گیا ہے وادیٔ جاں سے رواں دواں کیا کیا

وفا کی رات کوئی اتفاق تھی لیکن

پکارتے ہیں مسافر کو سائباں کیا کیا

ہزار شمعیں جلائے ہوئے کھڑی ہے خرد

مگر فضا میں اندھیرا ہے درمیاں کیا کیا