nimcha yar ne jis waqt baghal mein mara

nīmcha yaar ne jis vaqt baġhal meñ maarā

jo chaḌhā muñh use maidān-e-ajal meñ maarā

maal jab us ne bahut radd-o-badal meñ maarā

ham ne dil apnā uThā apnī baġhal meñ maarā

us lab o chashm se hai zindagī o maut apnī

ki kabhī pal meñ jalāyā kabhī pal meñ maarā

khīñch kar ishq-e-sitam-pesha ne shamshīr-e-jafā

pahle ik haath mujhī par thā azal meñ maarā

charḳh-e-bad-bīñ kī kabhī aañkh na phūTī sau baar

tiir naale ne mire chashm-e-zuhal meñ maarā

ajal aa.ī na shab-e-hijr meñ aur ham ko falak

be-ajal tū ne tamannā-e-ajal meñ maarā

ishq ke haath se ne qais na farhād bachā

is ko gar dasht meñ to us ko jabal meñ maarā

dil ko us kākul-e-pechāñ se na bal karnā thā

ye siyah-baḳht gayā apne hī bal meñ maarā

kaun fariyād sune zulf meñ dil kī tū ne

hai musalmān ko kāfir ke amal meñ maarā

urs kī shab bhī mirī gor pe do phuul na laa.e

patthar ik gumbad-e-turbat ke kañval meñ maarā

aañkh se aañkh hai laḌtī mujhe Dar hai dil kā

kahīñ ye jaa.e na is jañg-o-jadal meñ maarā

ham ne jaanā thā jabhī ishq ne maarā us ko

tesha farhād ne jis vaqt jabal meñ maarā

na huā par na huā 'mīr' kā andāz nasīb

'zauq' yāroñ ne bahut zor ġhazal meñ maarā

nimcha yar ne jis waqt baghal mein mara

jo chaDha munh use maidan-e-ajal mein mara

mal jab us ne bahut radd-o-badal mein mara

hum ne dil apna uTha apni baghal mein mara

us lab o chashm se hai zindagi o maut apni

ki kabhi pal mein jalaya kabhi pal mein mara

khinch kar ishq-e-sitam-pesha ne shamshir-e-jafa

pahle ek hath mujhi par tha azal mein mara

charKH-e-bad-bin ki kabhi aankh na phuTi sau bar

tir nale ne mere chashm-e-zuhal mein mara

ajal aai na shab-e-hijr mein aur hum ko falak

be-ajal tu ne tamanna-e-ajal mein mara

ishq ke hath se ne qais na farhad bacha

is ko gar dasht mein to us ko jabal mein mara

dil ko us kakul-e-pechan se na bal karna tha

ye siyah-baKHt gaya apne hi bal mein mara

kaun fariyaad sune zulf mein dil ki tu ne

hai musalman ko kafir ke amal mein mara

urs ki shab bhi meri gor pe do phul na lae

patthar ek gumbad-e-turbat ke kanwal mein mara

aankh se aankh hai laDti mujhe Dar hai dil ka

kahin ye jae na is jang-o-jadal mein mara

hum ne jaana tha jabhi ishq ne mara us ko

tesha farhad ne jis waqt jabal mein mara

na hua par na hua 'mir' ka andaz nasib

'zauq' yaron ne bahut zor ghazal mein mara