nibah baat ka us hila-gar se kuchh na hua

nibāh baat kā us hīla-gar se kuchh na huā

idhar se kyā na huā par udhar se kuchh na huā

javāb-e-sāf to laatā agar na laatā ḳhat

likhā nasīb kā jo nāma-bar se kuchh na huā

hamesha fitne hī barpā kiye mire sar par

huā ye aur to us fitna-gar se kuchh na huā

balā se girya-e-shab tū hī kuchh asar kartā

agarche ishq meñ āh-e-sahar se kuchh na huā

jalā jalā ke kiyā sham.a saañ tamām mujhe

bas aur to mujhe soz-e-jigar se kuchh na huā

rahīñ adū se vahī garm-joshiyāñ us kī

is āh-e-sard aur is chashm-e-tar se kuchh na huā

uThāyā ishq meñ kyā kyā na dard-e-sar maiñ ne

husūl par mujhe us dard-e-sar se kuchh na huā

shab-e-visāl meñ bhī merī jaan ko ārām

azīzo dard-e-judā.ī ke Dar se kuchh na huā

na dūñgā dil use maiñ ye hamesha kahtā thā

vo aaj le hī gayā aur 'zafar' se kuchh na huā

nibah baat ka us hila-gar se kuchh na hua

idhar se kya na hua par udhar se kuchh na hua

jawab-e-saf to lata agar na lata KHat

likha nasib ka jo nama-bar se kuchh na hua

hamesha fitne hi barpa kiye mere sar par

hua ye aur to us fitna-gar se kuchh na hua

bala se girya-e-shab tu hi kuchh asar karta

agarche ishq mein aah-e-sahar se kuchh na hua

jala jala ke kiya shama san tamam mujhe

bas aur to mujhe soz-e-jigar se kuchh na hua

rahin adu se wahi garm-joshiyan us ki

is aah-e-sard aur is chashm-e-tar se kuchh na hua

uThaya ishq mein kya kya na dard-e-sar main ne

husul par mujhe us dard-e-sar se kuchh na hua

shab-e-visal mein bhi meri jaan ko aaram

azizo dard-e-judai ke Dar se kuchh na hua

na dunga dil use main ye hamesha kahta tha

wo aaj le hi gaya aur 'zafar' se kuchh na hua