aankh bojhal hai nind tari hai

aañkh bojhal hai niiñd taarī hai

she'r kā silsila bhī jaarī hai

terī yādeñ haiñ be-qarārī hai

dil taḌaptā hai ashk jaarī hai

zindagānī kā bojh bhārī hai

chalte rahne kā hukm jaarī hai

dil ke bar-'aks kaise keh duuñ maiñ

zindagānī se dil kī yaarī hai

kal maiñ soyā thā ḳhuub shāyad aaj

raat bhar jāgne kī baarī hai

tum nahīñ ho ḳhud apnī hastī ke

saarī duniyā agar tumhārī hai

ġhaflatoñ kī jo ik ḳhumārī thī

merī taqdīr ne utārī hai

be-sukūnī meñ hai sukūñ sā kuchh

kuchh to hai jis kī parda-dārī hai

dard meñ mubtalā hai dil kyūñ-kar

dard se dil kī rishte-dārī hai

chain se so leñ jab kabhī chāheñ

kaifiyat yuuñ nahīñ hamārī hai

aankh bojhal hai nind tari hai

she'r ka silsila bhi jari hai

teri yaaden hain be-qarari hai

dil taDapta hai ashk jari hai

zindagani ka bojh bhaari hai

chalte rahne ka hukm jari hai

dil ke bar-'aks kaise keh dun main

zindagani se dil ki yari hai

kal main soya tha KHub shayad aaj

raat bhar jagne ki bari hai

tum nahin ho KHud apni hasti ke

sari duniya agar tumhaari hai

ghaflaton ki jo ek KHumari thi

meri taqdir ne utari hai

be-sukuni mein hai sukun sa kuchh

kuchh to hai jis ki parda-dari hai

dard mein mubtala hai dil kyun-kar

dard se dil ki rishte-dari hai

chain se so len jab kabhi chahen

kaifiyat yun nahin hamari hai