sare mausam to gaye KHushk bana kar mujhko

saare mausam to gaye ḳhushk banā kar mujh ko

tū bahāroñ kā ḳhudā hai to harā kar mujh ko

der se gum huuñ maiñ bachpan ke ghane jangal meñ

le ga.ī titlī kahāñ saath uḌā kar mujh ko

jal rahā huuñ maiñ tire haath meñ mash'al kī tarah

tū bhī ghir jā.egā zulmat meñ bujhā kar mujh ko

jab ta'alluq hī nahīñ koī mirā sāhil se

chāhe le jaa.e jahāñ lahr bahā kar mujh ko

zard paḌ jā.egī rangat mirī pal do pal meñ

kyā milegā tujhe kamre meñ sajā kar mujh ko

ḳhud-ba-ḳhud suukh ke gir jā.ūñgā 'ḳhāvar' maiñ bhī

ek din aur na Tahnī se judā kar mujh ko

sare mausam to gaye KHushk bana kar mujh ko

tu bahaaron ka KHuda hai to hara kar mujh ko

der se gum hun main bachpan ke ghane jangal mein

le gai titli kahan sath uDa kar mujh ko

jal raha hun main tere hath mein mash'al ki tarah

tu bhi ghir jaega zulmat mein bujha kar mujh ko

jab ta'alluq hi nahin koi mera sahil se

chahe le jae jahan lahr baha kar mujh ko

zard paD jaegi rangat meri pal do pal mein

kya milega tujhe kamre mein saja kar mujh ko

KHud-ba-KHud sukh ke gir jaunga 'KHawar' main bhi

ek din aur na Tahni se juda kar mujh ko