kya is ke siwa qimti shai mangti rab se

kyā is ke sivā qīmtī shai māñgtī rab se

us ne hī navāzā mujhe ammāñ ke laqab se

dhokā kabhī aañsū to kabhī ranj-o-musībat

allāh bachā.e hameñ duniyā kī talab se

jis ne kabhī dekhā nahīñ qudrat kā karishma

hotā hai pareshān vo qudrat ke ġhazab se

jo chāhiye vo aap sitam kījiye mujh par

niklegā na ik lafz kabhī mere bhī lab se

barbād huā amn-o-sukūñ mere nagar kā

kuchh log siyāsat yahāñ karne lage jab se

islāh se hī aatī hai kirdār meñ ḳhushbū

kam-zarf haiñ jo jalte haiñ islāh-e-adab se

daulat nahīñ shohrat nahīñ 'izzat nahīñ 'rūbī'

is zindagī meñ nuur hai ulfat ke sabab se

kya is ke siwa qimti shai mangti rab se

us ne hi nawaza mujhe amman ke laqab se

dhoka kabhi aansu to kabhi ranj-o-musibat

allah bachae hamein duniya ki talab se

jis ne kabhi dekha nahin qudrat ka karishma

hota hai pareshan wo qudrat ke ghazab se

jo chahiye wo aap sitam kijiye mujh par

niklega na ek lafz kabhi mere bhi lab se

barbaad hua amn-o-sukun mere nagar ka

kuchh log siyasat yahan karne lage jab se

islah se hi aati hai kirdar mein KHushbu

kam-zarf hain jo jalte hain islah-e-adab se

daulat nahin shohrat nahin 'izzat nahin 'rubi'

is zindagi mein nur hai ulfat ke sabab se