guft-o-shunid kar-e-dil aise na aaina karo

guft-o-shunīd kār-e-dil aise na aa.ina karo

ḳhud se tamām shab milo ḳhud se hī mashvara karo

jaao kahīñ na pūchhne rāz-sifāt-e-'ishq ko

dil ke mu'āmalāt haiñ dil hī se ibtidā karo

kaisī ravish hai 'ishq kī kaisā chalan hai husn kā

kitnī 'ajīb baat hai rasman koī gila karo

tark-e-ta'alluqāt kā ye bhī to ik usuul hai

is ko bhulā chuke ho gar yādoñ ko bhī ḳhafā karo

vo jo shahīd-e-nāz hai us kī anā ke vāste

ġham kī manāo 'iid tum rone kā hausla karo

āvāz aa rahī hai ye chalnā hai saath saath to

palkeñ bhigo bhigo rakho āñkhoñ se iltijā karo

rang-e-jahāñ ke rang meñ rahnā hai tum ko raat din

koī to mashġhala rakho koī to faisla karo

guft-o-shunid kar-e-dil aise na aaina karo

KHud se tamam shab milo KHud se hi mashwara karo

jao kahin na puchhne raaz-sifat-e-'ishq ko

dil ke mu'amalat hain dil hi se ibtida karo

kaisi rawish hai 'ishq ki kaisa chalan hai husn ka

kitni 'ajib baat hai rasman koi gila karo

tark-e-ta'alluqat ka ye bhi to ek usul hai

is ko bhula chuke ho gar yaadon ko bhi KHafa karo

wo jo shahid-e-naz hai us ki ana ke waste

gham ki manao 'id tum rone ka hausla karo

aawaz aa rahi hai ye chalna hai sath sath to

palken bhigo bhigo rakho aankhon se iltija karo

rang-e-jahan ke rang mein rahna hai tum ko raat din

koi to mashghala rakho koi to faisla karo