hazaron chehron pe chehre naqab ki surat

hazāroñ chehroñ pe chehre naqāb kī sūrat

maiñ paḌh sakā na kisī ko kitāb kī sūrat

jalūñgā kitne dinoñ 'ārizoñ ke sūraj meñ

kabhī to zulf bhī bikhre sahāb kī sūrat

mire savāl ko hī keh diyā ġhalat us ne

nazar na aa.ī use jab javāb kī sūrat

ye karb-e-‘ālam-e-barzaḳh uThāo hashr koī

nikālo jald koī ehtisāb kī sūrat

zabāñ ko laakh banā.eñ harīf-e-dil lekin

hai tarjumān-e-haqīqat janāb kī sūrat

'shafīq' chhoḌ chukā hai kabūtarāna mizāj

jhapaT sakoge na ab tum 'uqāb kī sūrat

hazaron chehron pe chehre naqab ki surat

main paDh saka na kisi ko kitab ki surat

jalunga kitne dinon 'arizon ke suraj mein

kabhi to zulf bhi bikhre sahab ki surat

mere sawal ko hi keh diya ghalat us ne

nazar na aai use jab jawab ki surat

ye karb-e-‘alam-e-barzaKH uThao hashr koi

nikalo jald koi ehtisab ki surat

zaban ko lakh banaen harif-e-dil lekin

hai tarjuman-e-haqiqat janab ki surat

'shafiq' chhoD chuka hai kabutarana mizaj

jhapaT sakoge na ab tum 'uqab ki surat