aisi ziya kahan hai shab-e-mahtab mein

aisī ziyā kahāñ hai shab-e-māhtāb meñ

poshīda hai jo nuur kisī ke naqāb meñ

naġhma-sarā ho koī to dil ke rabāb meñ

ye ḳhvāb dekhtī huuñ maiñ har ek ḳhvāb meñ

dekhā hai tum ne sho'la kabhī koī aab meñ

shāmil thā us kā pyaar bhī us ke 'itāb meñ

de kar javāb un ke salām-o-payām kā

kar lī hai apnī jaan hamīñ ne 'azāb meñ

rakkhe the ham ne dil ke dafātir khule hue

dāḳhil huā na koī mohabbat ke baab meñ

kyuuñ hashr sā bapā hai mire dil meñ jā-ba-jā

kis ne qadam rakhā hai ye dil kī rikāb meñ

fart-e-ḳhushī se mar hī na jā.ūñ kahīñ 'qamar'

tasvīr us ne bhej dī ḳhat ke javāb meñ

aisi ziya kahan hai shab-e-mahtab mein

poshida hai jo nur kisi ke naqab mein

naghma-sara ho koi to dil ke rabab mein

ye KHwab dekhti hun main har ek KHwab mein

dekha hai tum ne sho'la kabhi koi aab mein

shamil tha us ka pyar bhi us ke 'itab mein

de kar jawab un ke salam-o-payam ka

kar li hai apni jaan hamin ne 'azab mein

rakkhe the hum ne dil ke dafatir khule hue

daKHil hua na koi mohabbat ke bab mein

kyun hashr sa bapa hai mere dil mein ja-ba-ja

kis ne qadam rakha hai ye dil ki rikab mein

fart-e-KHushi se mar hi na jaun kahin 'qamar'

taswir us ne bhej di KHat ke jawab mein