ab ke chali hai kaisi hawa tere shahr mein

ab ke chalī hai kaisī havā tere shahr meñ

har chehra hai naqāb-numā tere shahr meñ

har shaḳhs kar rahā hai mohabbat kā kār-o-bār

phirtī hai sar-barahna vafā tere shahr meñ

har 'andalīb-e-rāz hai minqār zer-e-pā

miltā nahīñ hai izn-e-navā tere shahr meñ

ai shahr-yār-e-nāz tirī dil-kashī kī ḳhair

har aa.ina hai hosh-rubā tere shahr meñ

ye raaz kyā hai ahl-e-shu'ūr-o-nigāh bhī

sarsar ko keh rahe haiñ sabā tere shahr meñ

ab kis ke dar pe jā ke panāheñ talab kareñ

har shaḳhs ban gayā hai ḳhudā tere shahr meñ

'jazbī' isī ḳhayāl se maqtal meñ aa gayā

paatā hai be-gunāh sazā tere shahr meñ

ab ke chali hai kaisi hawa tere shahr mein

har chehra hai naqab-numa tere shahr mein

har shaKHs kar raha hai mohabbat ka kar-o-bar

phirti hai sar-barahna wafa tere shahr mein

har 'andalib-e-raaz hai minqar zer-e-pa

milta nahin hai izn-e-nawa tere shahr mein

ai shahr-yar-e-naz teri dil-kashi ki KHair

har aaina hai hosh-ruba tere shahr mein

ye raaz kya hai ahl-e-shu'ur-o-nigah bhi

sarsar ko keh rahe hain saba tere shahr mein

ab kis ke dar pe ja ke panahen talab karen

har shaKHs ban gaya hai KHuda tere shahr mein

'jazbi' isi KHayal se maqtal mein aa gaya

pata hai be-gunah saza tere shahr mein