nahin malum kahan aur kidhar ijad kiya

nahīñ mā'lūm kahāñ aur kidhar ījād kiyā

maiñ ne kis vajd-o-tajāvud meñ sar ījād kiyā

'ālam-e-'ishq to ik zarra thā jab ham aa.e

us qadar bantā gayā jis qadar ījād kiyā

terī ḳhātir tirā dil rakhne ko maiñ ne mire dost

qatra-e-ḳhūñ ko jamāyā jigar ījād kiyā

sang par sang ragaḌne se huā jo paidā

usī āhang ne raqs-e-sharar ījād kiyā

sab hī sote the 'adam meñ mirī bedārī ne

nuur paidā kiyā vaqt-e-sahar ījād kiyā

ho gayā koī to daryāft yahāñ par ik dam

kisī ne ḳhud ko magar 'umr bhar ījād kiyā

ḳhūn-e-dil ne mire ḳhurshīd ko roġhan baḳhshā

us kī āñkhoñ kī chamak ne guhar ījād kiyā

qabl-e-ādam bhī 'ajab daur-e-unūsat thā ki jab

sabhī mādāoñ ne mil kar ye nar ījād kiyā

vo tasavvur vo taḳhayyul vo tavahhum thā 'mirāsh'

jis ne 'abdullah' ko bār-e-digar ījād kiyā

nahin ma'lum kahan aur kidhar ijad kiya

main ne kis wajd-o-tajawud mein sar ijad kiya

'alam-e-'ishq to ek zarra tha jab hum aae

us qadar banta gaya jis qadar ijad kiya

teri KHatir tera dil rakhne ko main ne mere dost

qatra-e-KHun ko jamaya jigar ijad kiya

sang par sang ragaDne se hua jo paida

usi aahang ne raqs-e-sharar ijad kiya

sab hi sote the 'adam mein meri bedari ne

nur paida kiya waqt-e-sahar ijad kiya

ho gaya koi to daryaft yahan par ek dam

kisi ne KHud ko magar 'umr bhar ijad kiya

KHun-e-dil ne mere KHurshid ko roghan baKHsha

us ki aankhon ki chamak ne guhar ijad kiya

qabl-e-adam bhi 'ajab daur-e-unusat tha ki jab

sabhi madaon ne mil kar ye nar ijad kiya

wo tasawwur wo taKHayyul wo tawahhum tha 'mirash'

jis ne 'abdullah' ko bar-e-digar ijad kiya