KHushbu ki tarah dil mein samaenge kisi din

ḳhushbū kī tarah dil meñ samā.eñge kisī din

naġhme mire lab par tire ā.eñge kisī din

insāf tirā dekhne ai husn-e-jahāñgīr

ham 'adl kī zanjīr hilā.eñge kisī din

ye soch ke baiThe rahe dahlīz pe un kī

mahfil meñ hameñ bhī vo bulā.eñge kisī din

ḳhāmosh haiñ is vaqt tirī bazm meñ lekin

jo baat sunānī hai sunā.eñge kisī din

dīvār jo nafrat kī uThāte haiñ diloñ meñ

ham haath se un ke hī girā.eñge kisī din

kyā fā.ida ai barq nasheman ko jalā kar

tū jāntī hai ham to banā.eñge kisī din

māñgī huī 'izzat nahīñ 'izzat ye batāne

surḳhāb kā par ham bhī lagā.eñge kisī din

KHushbu ki tarah dil mein samaenge kisi din

naghme mere lab par tere aaenge kisi din

insaf tera dekhne ai husn-e-jahangir

hum 'adl ki zanjir hilaenge kisi din

ye soch ke baiThe rahe dahliz pe un ki

mahfil mein hamein bhi wo bulaenge kisi din

KHamosh hain is waqt teri bazm mein lekin

jo baat sunani hai sunaenge kisi din

diwar jo nafrat ki uThate hain dilon mein

hum hath se un ke hi giraenge kisi din

kya faida ai barq nasheman ko jala kar

tu jaanti hai hum to banaenge kisi din

mangi hui 'izzat nahin 'izzat ye batane

surKHab ka par hum bhi lagaenge kisi din