nafraton ke natije se na-ashna barbariyyat ke anjam se be-KHabar

nafratoñ ke natīje se nā-āshnā barbariyyat ke anjām se be-ḳhabar

log baiThe haiñ bārūd ke Dher par sub.h se be-ḳhabar shaam se be-ḳhabar

kuchh samajh meñ nahīñ aa rahā hai ki ye shukr kī baat hai yā shikāyat kī hai

us ne itne laqab de diye haiñ ki ham ho ga.e apne hī naam se be-ḳhabar

tum samajhte ho rangīn duniyā jise ik mashaqqat-kada hai hamāre liye

raat din bojh sāñsoñ kā Dhote haiñ ham zindagī ke har ārām se be-ḳhabar

sub.h ko chaa.e ke saath aḳhbār bhī harf-dar-harf ham chāTte haiñ magar

apne ghar kī shaboñ se bhī lā-'ilm ham apne āñgan ke ayyām se be-ḳhabar

mutma.in huuñ ki 'sāhil' mirī shā'irī hai mukammal mirī kāvish-e-mustaqil

merī ġhazleñ haiñ aamad se nā-āshnā mere ash'ār ilhām se be-ḳhabar

nafraton ke natije se na-ashna barbariyyat ke anjam se be-KHabar

log baiThe hain barud ke Dher par subh se be-KHabar sham se be-KHabar

kuchh samajh mein nahin aa raha hai ki ye shukr ki baat hai ya shikayat ki hai

us ne itne laqab de diye hain ki hum ho gae apne hi nam se be-KHabar

tum samajhte ho rangin duniya jise ek mashaqqat-kada hai hamare liye

raat din bojh sanson ka Dhote hain hum zindagi ke har aaram se be-KHabar

subh ko chae ke sath aKHbar bhi harf-dar-harf hum chaTte hain magar

apne ghar ki shabon se bhi la-'ilm hum apne aangan ke ayyam se be-KHabar

mutmain hun ki 'sahil' meri sha'iri hai mukammal meri kawish-e-mustaqil

meri ghazlen hain aamad se na-ashna mere ash'ar ilham se be-KHabar