har ek shaKHs zaban-e-bayan lage hai miyan

har ek shaḳhs zabān-e-bayāñ lage hai miyāñ

yahāñ to har koī ik dāstāñ lage hai miyāñ

nafas nafas hai na.ī āzmā.ishoñ kā salīb

ye zindagī bhī hameñ imtihāñ lage hai miyāñ

har ek dar pe yahāñ nafratoñ ke pahre haiñ

hamārā gaañv hamārā kahāñ lage hai miyāñ

ravish ravish pe sulagte haiñ fitna-gar kāñTe

abhī kahāñ ye chaman gulsitāñ lage hai miyāñ

muḳhālifat se bhī hai saḳht zaḳhm yaarī kā

bahut hī gahrā lage hai jahāñ lage hai miyāñ

kisī ke saath jo ik pal meñ kaT ga.ī thī kal

vo raat aaj bahut hī girāñ lage hai miyāñ

har ek shaKHs zaban-e-bayan lage hai miyan

yahan to har koi ek dastan lage hai miyan

nafas nafas hai nai aazmaishon ka salib

ye zindagi bhi hamein imtihan lage hai miyan

har ek dar pe yahan nafraton ke pahre hain

hamara ganw hamara kahan lage hai miyan

rawish rawish pe sulagte hain fitna-gar kanTe

abhi kahan ye chaman gulsitan lage hai miyan

muKHalifat se bhi hai saKHt zaKHm yari ka

bahut hi gahra lage hai jahan lage hai miyan

kisi ke sath jo ek pal mein kaT gai thi kal

wo raat aaj bahut hi giran lage hai miyan