aur bhi kuchh log karb-e-zist se haare lage

aur bhī kuchh log karb-e-zīst se haare lage

kuchh hameñ tanhā nahīñ hālāt ke maare lage

bārhā aisā huā āñkheñ hī dhokā khā ga.iiñ

phuul bele ke khile the aur mujhe taare lage

baat jo dil meñ thī chehra bhī thā us kā aa.ina

dostoñ se bhī kabhī dushman mire pyāre lage

kaifiyat dil par mire kuchh aisī taarī ho ga.ī

shāḳh par jab ḳhūb-sūrat phuul angāre lage

naam par maz.hab ke phailāte haiñ ham nafrat kī aag

ham muhazzab shahriyoñ se achchhe banjāre lage

yuuñ dil-e-nādāñ machal uThtā hai bachchoñ kī tarah

har tamannā jaise dil ko uḌte ġhubbāre lage

ham sajā kar ye jarīde ghar meñ rakhte haiñ 'zafar'

misl-e-daulat ham qalam-kāroñ ko fan-pāre lage

aur bhi kuchh log karb-e-zist se haare lage

kuchh hamein tanha nahin haalat ke mare lage

barha aisa hua aankhen hi dhoka kha gain

phul bele ke khile the aur mujhe tare lage

baat jo dil mein thi chehra bhi tha us ka aaina

doston se bhi kabhi dushman mere pyare lage

kaifiyat dil par mere kuchh aisi tari ho gai

shaKH par jab KHub-surat phul angare lage

nam par mazhab ke phailate hain hum nafrat ki aag

hum muhazzab shahriyon se achchhe banjare lage

yun dil-e-nadan machal uThta hai bachchon ki tarah

har tamanna jaise dil ko uDte ghubbare lage

hum saja kar ye jaride ghar mein rakhte hain 'zafar'

misl-e-daulat hum qalam-karon ko fan-pare lage