musafiron ko suhulat ho is liye maine

musāfiroñ ko suhūlat ho is liye maiñ ne

jalā diye haiñ sar-e-rāh kuchh diye maiñ ne

hayāt mujh ko mai-e-talḳh pesh kartī rahī

kamāl-e-zabt salāmat rakhā piye maiñ ne

qazā ko chāhiye ab merā ehtirām kare

jo din guzārne mushkil the vo jiye maiñ ne

ki maiñ ne ḳhvāb meñ ik raat apnā ghar dekhā

phir us ke baa'd musalsal safar kiye maiñ ne

jo phaT gaye the ta'alluq ke pairahan 'kāshif'

vo dar-guzar se mohabbat se sab siye maiñ ne

musafiron ko suhulat ho is liye main ne

jala diye hain sar-e-rah kuchh diye main ne

hayat mujh ko mai-e-talKH pesh karti rahi

kamal-e-zabt salamat rakha piye main ne

qaza ko chahiye ab mera ehtiram kare

jo din guzarne mushkil the wo jiye main ne

ki main ne KHwab mein ek raat apna ghar dekha

phir us ke ba'd musalsal safar kiye main ne

jo phaT gaye the ta'alluq ke pairahan 'kashif'

wo dar-guzar se mohabbat se sab siye main ne