munh-zabani quran paDhte the

muñh-zabānī qur.ān paḌhte the

pahle bachche bhī kitne būḌhe the

ik parinda sunā rahā thā ġhazal

chaar chhe peḌ mil ke sunte the

jin ko sochā thā aur dekhā bhī

aise do-chār hī to chehre the

ab to chup-chāp shaam aatī hai

pahle chiḌiyoñ ke shor hote the

raat utrā thā shāḳh par ik gul

chār-sū ḳhushbuoñ ke pahre the

aaj kī sub.h kitnī halkī hai

yaad paḌtā hai raat ro.e the

ye kahāñ dostoñ meñ aa baiThe

ham to marne ko ghar se nikle the

ye bhī din haiñ ki aag girtī hai

vo bhī din the ki phuul barse the

ab vo laḌkī nazar nahīñ aatī

ham jise roz dekh lete the

āñkheñ kholīñ to kuchh na thā 'alvī'

band āñkhoñ meñ lākhoñ jalve the

munh-zabani quran paDhte the

pahle bachche bhi kitne buDhe the

ek parinda suna raha tha ghazal

chaar chhe peD mil ke sunte the

jin ko socha tha aur dekha bhi

aise do-chaar hi to chehre the

ab to chup-chap sham aati hai

pahle chiDiyon ke shor hote the

raat utra tha shaKH par ek gul

chaar-su KHushbuon ke pahre the

aaj ki subh kitni halki hai

yaad paDta hai raat roe the

ye kahan doston mein aa baiThe

hum to marne ko ghar se nikle the

ye bhi din hain ki aag girti hai

wo bhi din the ki phul barse the

ab wo laDki nazar nahin aati

hum jise roz dekh lete the

aankhen kholin to kuchh na tha 'alwi'

band aankhon mein lakhon jalwe the