is se tumhein kya bahs bura ho ki bhala ho

is se tumheñ kyā bahs burā ho ki bhalā ho

dil pher do lillāh agar tum ne liyā ho

maiñ ġhair se laḌtā huuñ isī par to ḳhafā ho

tum mujh se qasam le lo agar kuchh bhī kahā ho

jhūTā to kabhī aap ko maiñ keh nahīñ saktā

haañ vā'da-farāmosh kahā ho to kahā ho

ab tak thī ye hasrat kahīñ dam bhar ko milo tum

aur ab ye tamannā hai ki dam bhar na judā ho

be-dard ko be-mehr ko ik dushman-e-jāñ ko

chāhā to kise is dil-e-muztar kā burā ho

aafat hai to us kī hai jo dil tum se lagā.e

shāmat hai to us kī hai jo pāband-e-vafā ho

har vaqt vo ab saath to rahte haiñ tumhāre

ye kyā ki 'qamar' haath bhī gardan meñ paḌā ho

is se tumhein kya bahs bura ho ki bhala ho

dil pher do lillah agar tum ne liya ho

main ghair se laDta hun isi par to KHafa ho

tum mujh se qasam le lo agar kuchh bhi kaha ho

jhuTa to kabhi aap ko main keh nahin sakta

han wa'da-faramosh kaha ho to kaha ho

ab tak thi ye hasrat kahin dam bhar ko milo tum

aur ab ye tamanna hai ki dam bhar na juda ho

be-dard ko be-mehr ko ek dushman-e-jaan ko

chaha to kise is dil-e-muztar ka bura ho

aafat hai to us ki hai jo dil tum se lagae

shamat hai to us ki hai jo paband-e-wafa ho

har waqt wo ab sath to rahte hain tumhaare

ye kya ki 'qamar' hath bhi gardan mein paDa ho