dil wahi ‘ahd-e-mulaqat purana chahe

dil vahī ‘ahd-e-mulāqāt purānā chāhe

aur zamāna ki palaT kar hī na aanā chāhe

vo to har haal meñ duurī hī baḌhānā chāhe

ab kisī had pe Thahar jaa.e zamānā chāhe

vo 'ajab shaḳhs hai andāz 'ajab haiñ us ke

khiñchtā bhī jaa.e marāsim bhī baḌhānā chāhe

dekh kar us ko zamāne kī taraf kyā dekheñ

jo vo chāhe vahī be-dard zamāna chāhe

us ke pindār kā kyā pūchhnā jo mast-e-ġhurūr

kam-nigāhī kā bhī ehsān jatānā chāhe

sādgī meñ bhī hai us ġhairat-e-gulshan kā vo rang

ḳhud bahār us kā hasīñ rang churānā chāhe

kabhī be-bāt shikāyat kabhī be-vaj.h sukūt

vo to bas tark-e-mohabbat kā bahāna chāhe

sāya-e-zulf nahīñ sāya-e-dīvār sahī

koī gosha ho musāfir to Thikānā chāhe

ye 'ajab sūrat-e-gulshan hai 'ajab rang-e-bahār

phuul ḳhud phuul se dāman ko chhuḌānā chāhe

gir na jaa.e kahīñ īmān-o-yaqīñ kī dīvār

aadmī saa.e ko dīvār banānā chāhe

hoñT sākit haiñ dil afsurda hai āñkheñ be-āb

zindagī tū mujhe patthar hī banānā chāhe

aa.e jis ġhunche se āvāz-e-shanāsā 'iqbāl'

dil us āvāz ko tasvīr banānā chāhe

dil wahi ‘ahd-e-mulaqat purana chahe

aur zamana ki palaT kar hi na aana chahe

wo to har haal mein duri hi baDhana chahe

ab kisi had pe Thahar jae zamana chahe

wo 'ajab shaKHs hai andaz 'ajab hain us ke

khinchta bhi jae marasim bhi baDhana chahe

dekh kar us ko zamane ki taraf kya dekhen

jo wo chahe wahi be-dard zamana chahe

us ke pindar ka kya puchhna jo mast-e-ghurur

kam-nigahi ka bhi ehsan jatana chahe

sadgi mein bhi hai us ghairat-e-gulshan ka wo rang

KHud bahaar us ka hasin rang churana chahe

kabhi be-baat shikayat kabhi be-wajh sukut

wo to bas tark-e-mohabbat ka bahana chahe

saya-e-zulf nahin saya-e-diwar sahi

koi gosha ho musafir to Thikana chahe

ye 'ajab surat-e-gulshan hai 'ajab rang-e-bahaar

phul KHud phul se daman ko chhuDana chahe

gir na jae kahin iman-o-yaqin ki diwar

aadmi sae ko diwar banana chahe

honT sakit hain dil afsurda hai aankhen be-ab

zindagi tu mujhe patthar hi banana chahe

aae jis ghunche se aawaz-e-shanasa 'iqbaal'

dil us aawaz ko taswir banana chahe